کبھی حمل ضائع ہوجاتا ہے اور کبھی ماں کی جان کو خطرہ۔۔ ماں بننے والی خواتین کی صحت کے لئے اتنے مسائل کیوں بڑھ گئے؟ ماہرین کا انکشاف

پہلے کے مقابلے میں اب اکثر ہی ماں بننے کے عمل سے گزرنے والی خواتین کو مختلف پیچیدگیوں اور مسائل کا سامنا کرنا پڑتا ہے۔ ان میں سے اکثر کا حمل ضائع ہوجاتا ہے تو کوئی عورت خود ہی جان کی بازی ہار جاتی ہے۔ حالیہ امریکی ریسرچ میں یہ بات انکشاف سامنے آیا ہے کہ پچھلے ٤٠ برسوں میں امریکہ میں حاملہ خواتین کی موت کی شرع میں خطرناک حد تک اضافہ ہوا ہے۔ البتہ ماہرین کا کہنا ہے کہ بروقت جان کر وجوہات کو کم کیا جاسکتا ہے۔

حمل میں پیچیدگیوں کی وجوہات

حالیہ مطالعے کے بعد اس مسئلے کی سب سے بڑی وجہ خواتین کا بڑی عمر میں شادی کرنا اور ماں بننے کے عمل سے گزرنا ہے۔ 40 سال کے بعد ماں بننے والی خواتین میں 25 برس کی حاملہ خواتین کے مقابلے میں موت کی شرع 7 گنا زیادہ ہوتی ہے۔

اس کے علاوہ بڑھتی عمر کا شکار خواتین میں ہائی بلڈ پریشر، ذیابیطس، زرخیزی میں کمی اور ذہنی تناؤ کی زیادتی بھی ماں بننے کے عمل میں دشواری پیدا کرتے ہیں۔

اس حوالے سے ماہرین کا کہنا ہے کہ وہ عورتیں جو ماں بننے کی خواہشمند ہیں انھیں اس سے جڑے خطرات اور طبی مسائل کا علم ہونا چاہیے جس کے لئے ضروری ہے کہ وہ پہلے ڈاکٹر سے رجوع کریں اور اس کے بعد فیملی پلاننگ کریں۔ اس کے علاوہ حمل ٹہر جانے کے بعد بھی ڈاکٹر سے باقاعدگی سے معائنہ کرواتی رہیں۔